ﻫﻤّﻚ ﻛﺎﻥ ﺟﺒﻞ ﻟﻮﻙ ﺍﻟﺼﺒﺮ ﺑﺘﻬﺪّﻭ ........
ﻣﺸﻮﺍﺭﻙ ﻃﻮﻳﻞ ﻛﺮّﺏ ﻟﺠﺎﻣﻚ ﺷﺪﻭ ..........
ﻛﻔﻚ ﻟﻠﻀﻌﻴﻒ ﺑﺎﻟﺤﺴﻨﺔ ﺩﺍﻳﻤﺎ ﻣﺪّﻭ ......
ﻭﺍﻟﺒﺎﺏ ﺍﻟﺒﺠﻴﺐ ﺍﻟﺮﻳﺢ ﺃﺧﻴﺮﻟﻚ ﺳﺪﻭ ...........
➖➖➖
ﺍﻏﺘﻨﻢ ﺍﻟﺸﺒﺎﺏ ﻗﺒﻞ ﺍﻟﺮﻭﻳﺲ ﻣﺎ ﻳﺸﻴﺐ ........
ﺍﻟﻌﺎﻗﻞ ﺩﻭﺍﻡ ﻟﻲ ﻧﻔﺴﻮ ﺑﺒﻘﻰ ﻃﺒﻴﺐ ................
ﻣﺎ ﺗﺨﻠﻴﻚ ﻋﺠﻮﻝ ﺍﻟﻌﺠﻠﺔ ﻣﺎ ﺑﺘﺼﻴﺐ .......
ﺩﺭﺏ ﺍﻟﻤﻬﻠﺔ ﻟﻠﺤﻮﻝ ﺇﻥ ﺻﺒﺮﺕ ﻗﺮﻳﺐ ..............
➖➖➖
ﺧﺎﻳﻨﺔ ﺍﻟﺪﻧﻴﺎ ﻣﺮﺍﺕ ﺗﺸﻮﻓﺎ ﻭﺟﻴﻬﺔ ............
ﻻﻣﻦ ﺗﻔﺘﻨﻚ ﺑﻲ ﺯﺧﺮﻓﺎ ﻭﺑﻲ ﺗﻴﻬﺎ ...............
ﺃﺣﺴﻦ ﺗﻨﺴﺘﺮ ﻣﻦ ﺍﻟﺒﻼﻭﻱ ﺍﻟﻔﻴﻬﺎ .........
ﺩﺍ ﺍﻟﺒﻴﺮﻗﺺ ﺑﻘﻮﻟﻮ ﺩﻗﻴﻨﺘﻮ ﻣﺎ ﺑﻐﻄﻴﻬﺎ ........
➖➖➖
ﻣﻄﻠﻮﻕ ﺍﻟﻠﺴﺎﻥ ﺍﺧﺘﺎﻫﻮ ﻻ ﺗﺒﺎﺭﻳﻬﻮ .......
ﺩﺭﺏ ﺍﻟﺤﺴﻜﻨﻴﺖ ﺷﻮﻑ ﺍﻟﺒﻼﻭﻱ ﺍﻟﻔﻴﻬﻮ ...........
ﻭﻟﺪﻙ ﺑﻲ ﻛﺘﺎﺏ ﺍﻟﻠﻪ ﺍﻟﻜﺮﻳﻢ ﺭﺑﻴﻬﻮ ...........
ﻭﺇﻥ ﻛﺒﺮ ﺍﻟﻮﻟﺪ ﻻ ﺗﻌﺍﻧﺪﻭ ﺑﻞ ﺧﺎﻭﻳﻬﻮ ...............
➖➖➖
ﺧﺎﻭﻱ ﺍﻷﻏﺒﺶ ﺍﻟﺤﺎﻓﻆ ﺍﻟﻜﺘﺎﺏ ﻭﺍﻟﻤﻠﺔ ....
ﺭﺍﻓﻊ ﺭﺍﺳﻮ ﻓﻮﻕ ﻣﺎﺑﺮﺿﻰ ﻋﻴﺸﺔ ﺍﻟﺬﻟﺔ .....
ﺍﺑﻌﺪ ﻣﻦ ﻃﺮﻳﻖ ﺍﻟﻤﺎﺑﻘﻮﻝ ﺑﺴﻢ ﺍﻟﻠﻪ ........
ﻭﺍﻟﺠﺎﺭ ﺍﻟﻔﺴﻞ ﺃﺣﺴﻦ ﺗﺴﻴﺒﻠﻮ ﺍﻟﺤﻠﺔ ...........
➖➖➖
ﻋﻴﺶ ﻓﻲ ﺍﻟﺪﻧﻴﺎ ﺿﻴﻒ ﺍﻋﻤﻞ ﺣﺴﺎﺏ ﻳﻮﻡ ﺑﺎﻛﺮ ....
ﻭﺍﺳﺠﺪ ﻟﻠﻜﺮﻳﻢ ﺍﺑﻘﺎﻟﻮ ﺣﺎﻣﺪ ﻭﺷﺎﻛﺮ ...........
ﺍﺳﺘﻐﻔﺮ ﻛﺘﻴﺮ ﻣﺎ ﺗﻨﺴﻰ ﺧﻠﻴﻚ ﻓﺎﻛﺮ ........
ﺍﻟﻤﻮﺕ ﺑﻠﺤﻘﻚ ﻟﻮ ﺑﺤﺮﺳﻮﻙ ﻋﺴﺎﻛﺮ ..........
➖➖➖
ﺃﺻﻠﻮ ﺍﻟﻤﻮﺕ ﻧﻬﺎﻳﺔ ﻟﻠﺒﺸﺮ ﺣﺘﻤﻴﺔ ..........
ﻻ ﻭﺍﺳﻄﺎﺕ ﺑﺘﺸﻔﻊ ﻟﻴﻚ ﻻ ﺟﻮﺩﻳﺔ ..............
ﺭﺑﻨﺎ ﻓﻲ ﺍﻟﻜﺘﺎﺏ ﺃﺩﺍﻧﺎ ﺣﺠﺔ ﻗﻮﻳﺔ ...............
ﻗﺎﻝ ﺍﻟﻤﻮﺕ ﺑﺠﻴﻚ ﻟﻮ ﻓﻲ ﺑﺮﻭﺝ ﻣﺒﻨﻴﺔ .............
➖➖➖
ﺷﺎﻳﻔﻚ ﻳﺎ ﻧﻔﺲ ﻓﻲ ﺍﻟﻔﺎﺭﻏﺔ ﻳﻮﻣﻲ ﺗﺠﻮﻃﻲ ...............
ﻓﻲ ﺍﻟﻐﻲ ﻭﺍﻟﻀﻼﻝ ﻣﻦ ﺑﺪﺭﻱ ﻗﺎﻋﺪﺓ ﺗﺼﻮﻃﻲ ....
ﺑﺎﺏ ﺍﻟﺘﻮﺑﺔ ﻣﻔﺘﻮﺡ ﻟﻴﻙ ﻗﺒﻞ ﻣﺎ ﺗﻤﻮﺗﻲ ... ،، ...
ﻭﺍﻥ ﻭﻗﻊ ﺍﻟﻘﺪﺭ ﻭﺭﻳﻨﻲ ﻭﻳﻦ ﺑﺘﻔﻮﺗﻲ ............
➖➖➖
ﻳﺎ ﺭﺏ ﺍﻟﻌﺒﺎﺩ ﺿﻮﻱ ﺍﻟﻘﺒﻮﺭ ﺍﻟﻌﺎﺗﻤﺔ ..........
ﻭﺍﺷﻔﻲ ﺻﺪﻭﺭﻧﺎ ﻣﻦ ﺷﺮ ﺍﻟﻬﻤﻮﻡ ﺍﻟﻜﺎﺗﻤﺔ ..........
ﻳﺎﺭﺑﻲ ﺍﻟﺬﻧﻮﺏ ﺻﺒﺤﺖ ﻋﻠﻲ ﻣﺘﺮﺍﻛﻤﺔ. ، ..........
ﺍﻏﻔﺮ ﻳﺎ ﻛﺮﻳﻢ ﻭﺍﺭﺯﻗﻨﺎ ﺣﺴﻦ ﺍﻟﺨﺎﺗﻤﺔ...
No comments:
Post a Comment